Pas vizitës që i bëri komunës së Bujanocit ku u takua me Kryetarin Shaip Kamberi dhe me Kryetarin e Këshillit Kombëtar Shqiptar, Shukri Ymerin, Kryetari i Këshillit Nacional të Boshnjakëve, dr.Sulejman Ugljanin gjatë vizitës në Preshevë u takua me zyrtarë të PVD-së dhe me Kryetaren e degës së PVD-së znj.Ardita Sinani. Me këtë rast Shërbimi për informim i PVD-së doli me një informatë në të cilën thuhet:
Gjatë ditës së sotme, në ambientet e Partisë për Veprim Demokratik, kryetarja e degës së PVD – së në Preshevë, Ardita Sinani e shoqëruar edhe nga këshilltarët e PVD në Kuvendin komunal, priti kryetarin e Këshillit Nacional të pakicës Boshnjake, dr. Sulejman Uglanin me bashkëpunëtorët e tij.
Vizita e z. Uglanin kishte për qëllim mbështetjen për Deklaratën e Kuvendit të këshilltarëve Shqiptarë në Luginë të Preshevës.
Kryetarja Sinani u shpreh e gatshme për vazhdimin e bashkëpunimit të mëtejmë të Këshillave të pakicës Shqiptare me atë Boshnjake, duke pasur parasysh që Serbia në këtë periudhë është nën monitorimin e BE – së.
Edhe z. Uglanin ishte i mendimit që bashkërendimi i hapave dhe kërkesave duhet të jetë i vazhdueshëm duke pasur parasysh mosgadishmërinë e Serbisë për realizimin e të drejtave të pakicave.
Preshevë, 19.07.2018
Qendra për Informim e
Partisë për Veprim Demokratik
