Policia e Kosovës ka kryer një aksion në lagjen “Tre Rrokaqiejt” në Mitrovicë të Veriut.
Zëdhënësi i Policisë së Kosovës për rajonin e Mitrovicës, Veton Elshani, tha për Telegrafin se aksioni është kryer në një banesë, ku edhe kanë konfiskuar kartela grafike, shok-bomba dhe poqa elektrikë, që shfrytëzohen për rritjen e bimëve të kanabisit dhe disa mjete të tjera.
“Pas informacioneve të pranuara nga Sektori për Luftimin e Narkotikëve Mitrovica Veri në bashkëpunim me Drejtorinë Rajonale Veri ka kryer një kontroll në një banesë në rrugën e Kolashinit, saktësisht në katin 11 te ‘Tre Rrokaqiejt’”, deklaroi ai.
Elshani tregoi se çfarë ka konfiskuar Policia gjatë aksionit.
“Në banesën që është shfrytëzuar nga S.M. (Kosovar/Serb) janë gjetur dhe konfiskuar 60 kartela grafike, makina antiminer S9, 13 ventilatorë, poqa elektrikë që shfrytëzohen për rritjen e bimëve të kanabisit, llambë elektrike për laborator, 51 fishekë , 8 shok-bomba të modifikuara”.
Zëdhënësi i Policisë bëri të ditur se i dyshuari nuk ka qenë aty gjatë aksionit.

