Ankesat zyrtare me shkrim nga ushtarët rusë janë shfaqur për herë të parë që nga shpërthimi i luftës. Dokumentet tregojnë se kushdo që nuk dëshiron të luftojë duhet të shkojë në burg.
Përsëri ka telashe brenda ushtrisë ruse. Një grup ushtarësh hedhin akuza të rënda kundër komandantëve të tyre. Ata i futën në një burg në Ukrainën lindore sepse refuzuan të luftonin në front. Siç raporton “Guardian”, duke cituar një avokat në Moskë, të paktën katër ushtarë rusë kanë bërë një ankesë. “Tashmë kemi një listë me emrat e rreth 70 ushtarëve që janë burgosur nga komandantët e tyre. Supozojmë se gjithsej rreth 140 ushtarë janë dashur të qëndrojnë përkohësisht pas hekurave për mosbindje ndaj urdhrave”, raporton avokati.
Në një nga letrat e ankesës, që disponon “Guardian”, një ushtar përshkruan se i është dashur të shkojë në burg për rreth një javë. Ai refuzoi të kthehej në fushën e betejës dhe më pas u mbajt në “qeli të ndryshme në zonën e Luhansk”.
“Për shkak të atyre që i konsideroj gabime taktike dhe strategjike të komandantëve të mi… dhe mospërfillje të plotë të jetës njerëzore… kam vendosur të mos vazhdoj operacionin ushtarak”, thotë një nga ushtarët. Më pas ai u mbyll në një dhomë me 25 ushtarë të tjerë. Mezi merrnin ushqim, u jepnin ushqim një herë në ditë. Grupi i ushtarëve ruhej nga tre anëtarë të grupit të frikshëm Wagner.
Milicia Wagner është një grup i frikshëm mercenar nga Rusia. “Ushtria në hije e Putinit”, siç njihen edhe trupat, është e lidhur ngushtë me presidentin rus. Zyrtarisht, milicia nuk ekziston sepse puna private mercenare është e ndaluar në Rusi. Prandaj, Grupi Wagner operon nën maskën e një kompanie private sigurie.
